Baby ini-hostage ng adik na daddy

ARESTADO ang isang  adik na ama makaraan tangayin at i-hostage ang sariling anak sa loob ng isang motel sa Caloocan City kamakalawa ng gabi.

Kinilala ang suspek na si Romeo Arranquez, 26, ng 328 PNR Compound, Brgy. 73 ng nasa-bing lungsod, nahaharap sa kasong serious illegal detention dahil sa pagtangay sa kanyang dalawang-buwan gulang sanggol na lalaki.

Nauna rito, naaresto na ang suspek ng mga tauhan ng Station Anti-Illegal Drugs (SAID) ngunit nakapuslit at nakuha ang anak lingid sa kanyang kinakasama na si Analyn Valencia dakong 8 p.m.

Pagkaraan ay nakatanggap ng text message si Valencia mula sa suspek at pinapupunta siya sa Clover Inn motel sa Bagong Barrio  kung gusto pa niyang makitang buhay ang sanggol kaya mabilis na nakipag-ugnayan sa pulisya ang ginang.

Ayon sa pulisya, noong una ay ayaw ibigay ng suspek ang sanggol at nagbantang may masamang mangyayari kapag nagpumilit pumasok sa kwarto ang mga awtoridad.

Dakong 4 a.m. ay napasok ng mga awtoridad ang kwarto at nakuha sa suspek ang sanggol.

Sinabi ng suspek na tinangay niya ang sanggol dahil gusto niyang makipagbalikan sa kanyang kinakasama.

Rommel Sales