HATAW! D'yaryo ng Bayan hatawtabloid.com
BINAWIAN ng buhay ang dalawang batang lalaki makaraan tamaan ng ligaw na bala ng sumpak na pinaputok ng kanilang nagwawalang kapitbahay sa Valenzuela City kamakalawa ng hapon.
Namatay habang nilalapatan ng lunas sa Valenzuela City Medical Center ang mga biktimang sina John Rey Claraval at Timothy Joshua de Leon, kapwa 8-anyos at residente ng Pinagpala Extension, Area 4, Pinalagad, Brgy. Malinta ng nasabing lungsod.
Sugatan din si Ronnie Montemayor, 28, kalugar ng mga biktima, unang nakasagutan ng suspek na si John Carlo Bayagosa, 24-anyos, ng nasabing lugar. Agad naaresto ang suspek sa follow-up operation ng awtoridad.
Sa ulat ni Sr. Supt. Rhoderick Armamento, hepe ng Valenzuela City Police, naganap ang insidente dakong 1 p.m. sa labas ng bahay ng dalawang batang biktima.
Unang nakasagutan ng suspek ang biktimang si Montemayor sa hindi malamang dahilan kaya’t umuwi si Bayagosa at kinuha ang kanyang sumpak.
Nang magsalubong ang dalawa ay tinangka ng suspek na barilin si Montemayor ngunit nahawakan ang sumpak hanggang magpambuno sila.
Sa puntong ito, pumutok ang sumpak kaya tinamaan sa kamay si Montemayor ngunit nasapol din ang dalawang bata na naglalaro sa hindi kalayuan.
Agad isinugod sa nabanggit na pagamutan ang mga biktima ngunit hindi na naisalba ang buhay.
Rommel Sales
