HATAW! D'yaryo ng Bayan hatawtabloid.com
PARATING na sa bansa sa Nobyembre 12, Miyerkoles ng gabi ang mahigit 100 Filipino peacekeepers mula Liberia.
Inihayag ito ni Armed Forces of the Philippines (AFP) Chief of Staff Lt. Gen. Gregorio Pio Catapang Jr., makaraan kompirmahing pumasa sa Ebola screening test ng United Nations (UN) ang 108 sundalo.
Idinagdag ni Catapang, kasamang uuwi ng mga sundalo ang 24 pang peacekeepers mula sa hanay ng Philippine National Police (PNP) at isang taga-Bureau of Jail Management and Penology (BJMP).
Bagama’t nagnegatibo sa Ebola virus batay sa test sa Liberia, ika-quarantine pa rin ang mga pauwing peacekeeper sa Caballo Island na sakop ng Naic, Cavite.
Tinawag ng Philippine Air Force na “Isla ni Kuya” ang naturang lugar. Nakahanda na anila ang barracks kung saan mananatili ang peacekeepers. Nakabitan na nila ito ng koryente, linya ng komunikasyon gayondin ng wi-fi, at airconditioning unit.
Pagdating ng mga sundalo sa Villamor Air Base sa Miyerkoles, agad silang ihahatid by land sa Sangley Point sa Cavite saka isasakay sa barko ng Philippine Navy patungong isla. Ang Navy ang mangangasiwa sa isla.
Mananatili sila roon sa loob ng 21 araw para matiyak na hindi nahawa nang nakamamatay na virus.
Samantala, humihingi ng pang-unawa si Catapang partikular sa pamilya ng mga peacekeeper.
Bibigyan pa rin ng hero’s welcome ang mahigit 100 peacekeepers ngunit maaantala ito dahil sa quarantine.
