41,000 parak ipakakalat sa undas

NAKAHANDA na ang Ligtas Undas 2014 ng Department of Interior and Local Government (DILG) at Philippine National Police (PNP) kabilang ang pagpapatupad ng full alert status simula Oktubre 30.

Inilatag ni DILG Secretary Mar Roxas ang paghahanda ng pinagsanib na pwersa ng kagawaran at ng kapulisan, Martes ng umaga.

Aniya, may mahigit 41,000 pulis sa buong Filipinas ang nakaalerto ngayong Undas sa mga dadagsaing lugar tulad ng sementeryo, lugar ng sambahan, bus terminals, seaports at airports, pasyalan, vital installations at iba pa.

Banggit niya, sa National Capital Region (NCR) pa lamang ay may 4,278 pulis na ang nakakalat, ilang libo lang ang layo sa 6,000 pulis na nakaalerto noong huling State of the Nation Address (SONA) ni Pangulong Benigno “Noynoy” Aquino III.

Dahil dito, kanselado ang leave ng mga pulis at extended ang duty nila. Umaasa ang kalihim na magiging 100% ang attendance ng mga pulis.

Bukod sa mga pulis, humingi na rin ng tulong ang DILG sa force multipliers tulad ng civilian volunteer groups at barangay patrol.

May kooperasyon na rin aniya sa iba’t ibang ahensya tulad ng Office of Port Securities, Metro Manila Development Authority (MMDA), Land Transportation Franchising and Regulatory Board (LTFRB), Land Transportation Office (LTO), Marina, Philippine Ports Authority (PPA), Philippine Coast Guard (PCG) at iba pa.

Sa Lunes, Nobyembre 2 inaasahan ang pagdagsa ng mga mag-uuwiang kababayan mula sa iba’t ibang probinsya.

Ibababa ang full alert status sa Nobyembre 3.

Jaja Garcia