Dismissal vs Justice Ong pinagtibay ng SC

PINAGTIBAY ng Supreme Court (SC) ang dismissal order laban kay Sandiganbayan Associate Justice Gregory Ong dahil sa kaugnayan sa tinaguriang pork barrel scam queen na si Janet Lim Napoles.

Sinabi ni SC spokeperson Atty. Theodore Te, ibinasura ng kataas-taasang hukuman ang motion for reconsideration na inihain ni Ong na humihiling baguhin ang naunang September 23 ruling na nagtatanggal sa kanya sa serbisyo.

Sa nasabing desisyon, si Ong ay walang matatanggap na ano mang benepisyo mula sa gobyerno maliban sa kanyang accrued leave benefits at hindi na maaaring magtrabaho sa gobyerno.

Magugunitang mismong ang SC ang nagkusa ng imbestigasyon laban sa kaugnayan ni Ong kay Napoles.

Lumabas sa imbestigasyon, nakatanggap nang malaking halaga si Ong mula kay Napoles kapalit ng pag-abswelto sa negosyante sa kasong kinakaharap kaugnay ng maanomalyang pagbili ng 500 Kevlar Helmets para sa Philippine Marines noong 1998.

Si Ong ang nagsilbing chairman ng Sandiganbayan 4th division.

Leonard Basilio