HATAW! D'yaryo ng Bayan hatawtabloid.com
LEGAZPI CITY- Nagpasaklolo ang Camarines Norte Police Provincial Office sa Police Regional Office -5 upang hanapin ang asawa ng gobernador ng lalawigan at isa pang kasama hinihinalang dinukot nitong Biyernes, Oktubre 17.
Ayon kay PO1 Michael Lubiano y Cabines, nakadestinong pulis sa Camarines Norte PPSC sa bayan ng Vinzons, sakay ng itim na Toyota Fortuner (PRI 744) si Gng. Josie Tallado, asawa ni Governor Edgardo “Egay” Tallado, kasama ang isang nagngangalang Darlene Francisco, patungo sa Brgy. 3 sa nasabing bayan.
Ayon kay Lubiano, dakong 3 p.m. nitong Biyernes nang bilinan siya ni Tallado na hintayin sila hanggang 7 p.m. sa nasabing barangay ngunit lagpas na ang nasabing oras ay hindi dumating ang ginang.
Ilang ulit din niyang sinubukan na tawagan ang numero ni Francisco, ngunit walang sumasagot hanggang magdamag.
Dakong 9 a.m. nang ireport ni PO3 Rico Asuncion, nakadestinong pulis sa PPSC, na ang sasakyang kinalululanan nina Mrs. Tallado at Francisco ay narekober sa bahagi ng Maharlika Highway sa Napolidan, Lupi, Camarines Sur ngunit wala ang mga nakasakay rito.
Hanggang sa ngayon ay blangko pa rin ang mga awtoridad kung ano ang nangyari sa mga biktima.
(HATAW News Team)
