HATAW! D'yaryo ng Bayan hatawtabloid.com
ni James Ty III
NAGING guest sa ASAP 19 kamakailan ang singer-songwriter na si Ogie Alcasid at nagpakuha pa siya ng retrato kasama si Erik Santos sa Instagram account niya.
Dahil sa pangyayaring ito ay marami ang nagsasabing malaki ang posibilidad na lilipat si Ogie sa ABS-CBN lalo na tila nagiging tahimik ang career niya sa TV5.
Sa ngayon ay host si Ogie ng Let’s Ask Pilipinas sa TV5 bukod sa pagiging musical consultant ng estasyon ni Manny V. Pangilinan.
Mula noong lumipat si Ogie mula GMA patungong TV5 ay hindi naging matagumpay ang ilang shows niya tulad ng The Mega and the Songwriter nila ni Sharon Cuneta na pumalpak sa rating kalaban ang Gandang Gabi Vice.
Hindi na rin itinuloy ng TV5 ang dapat sanang teleserye ni Ogie dahil ilalagay ng estasyon ang mga laro ng PBA sa primetime.
Matatandaang umalis si Ogie sa GMA dahil hindi na siya masaya sa takbo ng Sunday All-Stars na bukod sa sobrang pangit ay inilipat ito ng oras sa alas-dos ng hapon na senyales na talagang talo ito sa ASAP.
Bukod dito, kaibigan si Ogie nina Martin Nievera at Gary Valenciano at gumawa pa siya ng kanta para sa dalawang haligi ng ASAP.
Nasa Los Angeles ngayon ang grupo ng ASAP at ipalalabas ang show nila doon sa TV sa October 19.
Pre-taped ang guesting ni Ogie sa ASAP bago sila umalis patungong LA.
