Date ni Kris at Derek kinondena ng misis (Presidential influence ginagamit)

KINONDENA ni Mary Christine Jolly-Ramsay, asawa ng actor na si Derek Ramsay ang umano’y pakikipag-date ng huli sa presidential sister na si Kris Aquino na napanood pa sa isang television program.

Ayon kina Mary Christine at abogadong si Atty. Argee Guevarra ang pagde-date ng dalawa ay indikasyon umano na hindi natatakot ang actor sa kasong kanyang kinakahap at pagiging ‘untouchable.’ Si Derek ay sinampahan ng concubinage at anti-violence against women and children sa Makati at Parañaque courts.

“Derek Ramsay seeks to convey the message to my client, and insinuate even to Justice Secretary Leila de Lima and to the Parañaque Prosecutor’s Office that he is ‘untouchable’ and he is ‘above the law’ since he is dating the sister of the most powerful man in the country today,” ani Guevarra in an impromptu press briefing.

Sinabi ni Guevarra, malaki ang naging epekto ng nasabing video sa anak ni Derek na si Austin,11 na kasalukuyang nasa bansa. Sa katunayan umano sobrang iyak ng bata nang mapanood sa TV at makitang magkasama si Kris at Derek.

Nagpahayag umano ng sama ng loob at pagtataka ang bata kung bakit ibang babae ang kasama ng ama imbes na kanyang ina.

Binalaan ni Guevarra si Derek na maaaring gamiting ebidensiya ang video ng pagde-date nina Kris at Derek sa pagsasampa ng kasong Anti-violence case against women and their children.

Idinagdag ng abogado na psychological abuse para sa mga bata ang ipinakita sa video, hindi lamang kay Mary Christine at kay Austin kundi maging sa publiko na hindi umano ikinahihiya ang pambabae at panloloko. (HNT)