P8 pasahe ibabalik ng Pasang Masda

HANDA ang grupong Pasang Masda na ibalik sa P8.00 ang minimum fare sa jeep.

Ito ang inihayag ni Pasang Masda President Obet Martin kasunod nang pagbaba ng presyo ng diesel.

Gayonman, makikipag-ugnayan pa aniya sila sa Land Transportation Franchising and Regulatory Board (LTFRB) para ipaabot ang kanilang kondisyon.

“Gusto lang po naming magkaroon nang katiyakan sa board, sa LTFRB, kay Chairman [Winston] Ginez… Kung bumalik ba ang presyo sa pagtaas, e pwede bang ibalik kaagad natin ang pasahe sa P8.50?”

Nanawagan na rin si Martin sa Department of Energy (DoE) para tiyaking tama ang paggalaw ng presyo ng mga kompanya ng langis.

“‘Yun ho bang ibinababa e tama? Baka kailangang mas malaki pa ang ibaba sapagkat… ang big three na ‘yan e hindi ho nagpapatalo ‘yan,” katwiran ni Martin.