Miriam nag-walkout sa Senado

DALAWANG buwan makaraan ihayag na siya ay may lung cancer, nagbalik sa trabaho si Senadora Miriam Defensor-Santiago kahapon ngunit nag-walk out.

Ito’y makaraan kwestyonin ni Ilocos Norte Rep. Rodolfo Fariñas ang proceedings ng Commission on Appointments Foreign Affairs Committee dahil sa kakulangan ng quorum.

Pinili ni Santiago na manguna sa kompirmasyon ng appointments ng 48 opisyal dahil sa laki ng bilang nila at nakasanayan na ng senadora na gawin itong mabilis ngunit tila pinababagal ni Fariñas.

“‘Pag maraming nominees, gusto ko ako para mabilis kasi nga ang procedure ko gano’n. E patatagalin (ni Fariñas) e that is so bureaucratic and I hate it,” nanggagalaiting inihayag ni Santiago sa press conference.

“I hate bureaucracy for the sake of delay, that produces delay,” aniya.

Paliwanag ng senadora, gusto niyang umaksiyon agad dahil kapag pinatatagal ang isang gawain ay pipiliin na lang ng mga tao na magbayad na siyang pinagkakakitaan ng ilang mapagsamantala.

Aniya, tila nais ng kongresista na hintayin ang mga kasamahan sa bawat tawag ng nominee ngunit galit na hirit niya, “E ‘di mag-antayan kami do’n, ako chairman paantayin ng aking members?”

“I‘m always punctual not as a personal eccentricity but because I hate to make the public wait,” sabi niya kasunod ng pagbanggit na natanggap niya ang Laureate of the Asian Nobel Prize, o ang Ramon Magsaysay Award for Government Service dahil sa mabilis at malinis niyang trabaho.

Gayonman, hindi siya humingi ng ano mang paumanhin mula sa nakabanggang kongresista.

Bago mag-walkout, pinalayas ng senadora ang isang cameraman mula sa kwarto habang ginaganap ang proceedings dahil naistorbo aniya siya.

Dahil sa insidente ay kinansela ang pagdinig.

(CYNTHIA MARTIN/

NIñO ACLAN)