HATAW! D'yaryo ng Bayan hatawtabloid.com
ni Roldan Castro
NOONG birthday party namin ay dumalo ang mag-amang Nino Muhlach at ang kanyang mag-ina na sina Ms. Dianne at si Alonzo.
Pinagmamasdan talaga namin si Alonzo, carbon copy talaga ni Onin. Ramdam namin na si Alonzo ang magmamana ng pagiging child wonder ni Nino mula nang mapanood namin sa PBB All In.
Okey lang kay Nino ang pagso-showbiz ng anak.
“Para naman sa kanya iyon, eh. Kung saka-sakaling mabigyan siya ng magandang breaks, para sa kinabukasan din naman niya iyon. Kasi I will make sure na kung ano ang ginawa sa akin ng daddy ko, ganoon din ang gagawin ko sa kanya. Na kung anong kinikita niya, talagang kanya lang at ilalagay ko sa trust fund,” deklara ni Nino.
Hindi nga naman nilustay ng tatay ni Nino ang mga kinita niya noong bata siya. Napagpatayo pa siya ng El Nino Apartelle na hanggang ngayon ay napakikinabangan pa rin niya ang nasabing building.
Tatlo ngayon ang pelikulang ginagawa ni Alonzo. Dalawa ang filmfest movie niya. Isa na rito ‘yung kay Vic Sotto na My Big Bossing’s Adventures with Ryzza Mae. Si Alonzo ang ipinalit kay Bimby. Join din siya sa filmfest movie ng ninong niyang si Dingdong Dantes na Kubot: Aswang Chronicle-2. Kasama rin siya sa pelikula nina John Lloyd Cruz, Gretchen Barretto, Richard Gomez, Enrique Gil, at Jessy Mendiola na Almost A Love Story ng Star Cinema.
Okey lang kay Onin na tuksuhin na stage father.
“Kapag anak mo pala talaga, talagang hindi maiiwasan iyong ganoon, eh. Pero hindi naman ako iyong tipong magbabantay sa set, alam mo iyon? Although ngayon, hinahanap pa ako ni Alonzo at hindi niya kayang mag-shooting na wala ako. Kasi sa akin siya nagpapaturo, hindi siya nakikinig sa iba, eh.
“So kapag may shooting siya, kasama ako dahil ako ang nagtuturo sa kanya,” sambit pa ni Nino.
Isa kasi sa itinuturo ngayon ni Onin ay ang pagta-Tagalog ni Alonzo dahil Inglisero ito. Hindi naman kasi akalain ni Nino na magiging artista ang anak niya.
Kahit naman si Onin ay hindi pa rin pinababayaan ang showbiz career. Katunayan kasama rin siya sa pelikulang Mara na kasama sina Isabelle Daza, Paulo Avelino, at Jasmine Curtis-Smith. Join din siya sa My Big Bossing’s Adventures. Kapipirma lang niya ng kontrata kay Dondon Monteverde bilang bagong manager.
Tsuk!
