HATAW! D'yaryo ng Bayan hatawtabloid.com
DINALA sa tangapan ng Manila Police District – General Assignment Section (MPD-GAS) si Flora Pineda matapos masakote sa Arias Gate ng Malacañang dahil sa dala niyang kalibre .45. Plano umano niyang pababain sa pwesto si PNoy dahil sa sobrang kahirapan na dinaranas ng mga kababayan. (BONG SON)
NAKALUSOT sa mahigpit na seguridad ng Malacañang ang isang babae na armado ng kalibre .45 na gustong pababain sa puwesto si Pangulong Benigno Aquino III.
Bitbit ang kal. 45, nakapasok hanggang Arias Gate ng Palasyo ang suspek na kinilalang si Flora Pineda, tubong Tuguegarao, Cagayan, ng 3A Herbs St., Zone 4, Barangay Signal, Taguig City, ngunit mabils na nadisarmahan ng isang kagawad ng Presidential Security Group (PSG) dakong 3:45 p.m. kahapon.
Bagama’t nagsisigaw si Pineda nang kunin ng mga sundalo ang kanyang baril at shoulder bag habang tumatangging sabihin ang kanyang pangalan, hindi naman siya umalma nang paupuin lang sa sentry gate ng PSG.
Wala rin siyang pagtutol nang halungkatin ang kanyang mga gamit hanggang pagkaguluhan ng mga mamamahayag ang nakompiska sa kanyang kal. 45 na may mga bala at barangay ID.
Nang usisain ng media, sinabi ni Pineda na ang baril ay ‘napulot’ lang niya sa isang restawran sa Triumph Bldg., sa FTI Compound sa Taguig City, na kanyang pinagtatrabahuan bilang kasambahay.
Wala umano siyang pakay na manakit at ang baril na dala ay ‘panakot’ lamang para pababain sa poder si Aquino dahil hindi na niya matiis ang nakikitang paghihirap na mga kapwa Pilipino.
“Huwag n’yo na ako tanungin ng kung ano-ano, kahit imbestigahan n’yo ako ay wala kayong makikitang record ko. Wala kayong pakialam kung sino ang amo ko,” sigaw ni Pineda.
Hindi tumutol si Pineda nang isakay ng mga sundalo sa mobile car ng Manila Police District para imbestigahan sa estasyon ng pulisya.
(May dagdag na ulat ni John Bryan Ulanday)
ni Rose Novenario
