2 suspek sa Bulacan rape-slay kinilala ng testigo

KINILALA ng isang testigo ang dalawang suspek sa gang rape at pagpatay sa 26-anyos na si Anria Espiritu sa Calumpit, Bulacan, sa inquest proceedings kamakalawa.

Positibong kinilala ng nasabing testigo ang mga suspek na sina Ramil de Arca at Melvin Ulam, nang ipresenta ang dalawa kasama ang jeepney driver na si Elmer Joson, sa fiscal’s office sa Malolos, Bulacan. Ang tatlo ay kinasuhan ng rape with homicide.

Ayon sa ulat, nakita ng testigo sina De Arca at Ulam, kasama ng biktima habang lulan ng jeepney na dumaan habang siya ay nakatayo sa gilid ng kalsada dakong 1 a.m. hanggang 2 a.m. noong Agosto 14.

Bagama’t wala aniyang poste ng ilaw sa lugar ay malinaw niyang nakita ang dalawang suspek at ang biktima.

“Maliban po sa ilaw sa sasakyan … Maliwanag po ‘yung ilaw sa loob.”

Gayonman, hindi niya ma-identify si Joson na inaresto ng mga pulis nang dumalo sa burol ng biktima nitong Lunes.

Pinagsuspetsahan si Joson na kabilang sa krimen nang makita ng pamilya Espiritu ang maraming kalmot at sugat sa kanyang katawan. Idiniin ni Joson na ito ay dahil sa pag-aaway nilang mag-asawa. (MICKA BAUTISTA/DAISY MEDINA)