Dalaga ninakawan na ginahasa pa

BUKOD sa pagnanakaw, ginahasa ng isa sa dalawang suspek ang dalagang may-ari ng apartment na kanilang pinasok sa San Rafael, Bulacan, kamakalawa.

Sa ulat na ipinarating sa Bulacan Provincial Police Office, bandang 11:30 p.m. nang pasukin ng dalawang hindi nakikilalang lalaki ang apartment ng biktimang itinago sa pangalang Momay, 25, ng Altavida Subd., San Roque, San Rafael, Bulacan.

Mahimbing na natutulog ang biktima nang limasin ng mga suspek ang dalawang laptop, dalawang cellphone unit, apat na tseke ng RCBC bank, at ibang mamahaling accessories.

Napag-alaman sa pulisya, isa sa mga suspek ang nang-reyp sa biktima bago tumakas gamit ang blue gray Honda Civic (RFV-147) ng biktima.

Ayon sa biktima, nagising siya, nakatutok na ang patalim sa kanyang tagiliran kaya wala na siyang nagawa hanggang gahasain.

Masusing imbestigasyon ang isinasagawa ng mga awtoridad kaugnay sa kaso upang makilala at maaresto ang mga suspek.

(RAUL SUSCANO)