Koreano nag-suicide

PUNO ng dugo nang matagpuan ang isang Korean national sa loob ng kanyang condominium unit sa Pasay City, kamakalawa ng gabi.

Kinilala ni Chief Insp. Angelito de Juan, hepe ng Investigation Detective & Management Section (IDMS) ng Pasay City Police, ang biktimang si Jong Soo Kim, 44, ng Room 1904, 19th Floor, Antel Building, Roxas Boulevard, ng naturang lungsod.

Sa pahayag ng kasambahay na si Gloria Impas, kina SPO3 Allan Valdez, SPO1 Evaresto Sarngey at PO2 Mario Golondrina, dakong 7:20 p.m. nang umalis siya sa condo unit at naiwan mag-isa sa loob ng kanyang silid ang biktima.

Pagdating kinaumagahan, tumambad sa kanya ang duguang bangkay ng biktima kaya ipinagbigay-alam sa guwardya.

Ayon sa guwardyang si Olayon, wala silang nakitang bisita ng biktima magmula nang umalis si Impas.

Isang kalibre .45 pistol ang natagpuan sa tabi ng bangkay ng biktima kaya inaalam ng pulisya kung nagbaril sa sarili ang Koreano.

Pahayag ng kaibigan ng biktima na si Joe Choi, ilang araw nang dumadaing sa kanya ang kaibigan na may problema sa pera.(JAJA GARCIA)