14-anyos dalagita huli sa repack ng P5.9-M Shabu

CEBU CITY – Tiniyak ng Cebu City Police Office na may mananagot sa batas kaugnay sa bulto-bultong shabu na nakompiska mula sa isang 14-anyos dalagita sa Balaga Drive, Brgy. Labangon, lungsod ng Cebu.

Ayon kay City Intelligence Branch chief, Supt. Romeo Santander, inaalam pa nila kung saan at sino ang naging amo ng dalagitang nahuli nitong Sabado ng gabi.

Aniya, tinitingnan nila ang legal implications ng suspek dahil sa edad niyang 14-anyos pa lamang.

Sinabi ni Santander, ang dalagita ay drug courier lamang at hindi siya mismo ang nagtutulak.

Sa tactical investigation, inamin ng suspek na may taong naghahatid sa kanya ng illegal na droga para i-repack bago dalhin sa mga drug pusher.

Nabatid din na ang dalagita ay tumatanggap ng P1,000 bawat transaksiyon mula sa kanyang amo ngunit hindi masabi ang pangalan.

Iginiit ng dalagita na siya ay naglayas dahil sa hindi kanais-nais na karanasan sa mga magulang.

Sa ngayon ang suspek ay temporaryong ikinustodiya sa pulisya at itu-turn over sa DSWD.

Una rito, sa raid ng pulisya sa isang bahay na naging drug den, laking gulat nila nang tumambad sa kanilang paningin ang dalagita habang nagre-repack ng shabu na tinatayang nagkakahalaga ng P5.9 milyon.

HATAW News Team