Sanggol patay, 2 pa sugatan sa tricycle

RIZAL – Binawian ng buhay ang isang taon gulang sanggol na babae habang dalawa pa ang sugatan makaraan mawalan ng kontrol ang sinasakyan nilang tricycle kamakalawa ng umaga sa Antipolo City.

Kinilala ni Antipolo City Police chief, Supt. Arthur Masungsong ang biktimang namatay na si Princess Jane Clerigo, residente ng Black Cross, Upper Nazareneville, Brgy. San Roque ng nasa-bing lungsod.

Habang nilalapatan ng lunas ang iba pang mga pasahero na sina Nelia Ambos, 49, ng Filinvest, Dulong Crasher, at Marilyn Laxamana, 32, ng Black Cross, Upper Nazareneville, kapwa ng nasabing barangay.

Arestado ang driver ng tricycle na si Noel Arcilla, 34, may asawa, residente ng Lornaville Subd., Sitio Colaique, ng nasabi rin lugar.

Ayon sa ulat, dakong 10:30 a.m. nang maganap ang insidente sa Marigman St., Goldenhills, Brgy. San Roque, Antipolo City.

Tinatahak ng tricycle (OE-5723) ang nabanggit na lugar nang masira ang mudguard nito at bumara sa gulong dahilan para mawalan ng kontrol ang nasabing sasakyan.

Nahaharap ang tricycle driver sa kasong reckless imprudence resulting in homicide and serious physical injuries.

(MIKKO BAYLON)