HATAW! D'yaryo ng Bayan hatawtabloid.com
MAGTUTUOS sa semifinals ang grand slam seeking San Mig Super Coffee Mixers at Talk ‘N Text Tropang Texters matapos nilang patalsikin ang mga nakalaban sa quarterfinals ng PLDT Home TelPad PBA Governors’ Cup sa Smart Araneta Coliseum kamakalawa ng gabi.
Pinindot ng top seed Tropang Texters ang 99-84 panalo kontra No. 8 seed Barako Bull Energy Cola sa unang laro at pagkatapos ay hinigop ng defending champion Mixers ang second semis slot nang pauwiin nila ang San Miguel Beermen, 97-90.
Parehong naghabol ang TNT at San Mig subalit sa second half ay bumanat sila upang iayos ang kanilang pagkikita sa Final Four.
Abante ng siyam na puntos ang Energy Cola sa kalagitnaan ng third canto subalit hinabol ito ng Tropa para makuha ang lamang papasok ng fourth period, 65-73.
Umabot naman sa 15 puntos ang hinabol ng Mixers sa Beermen, 12-27 subalit umarangkada ang una sa payoff period para itakas ang panalo.
Bumira ng career-high 16 points sa 6-of-9 shooting sa 23 minutes lang ang rookie na si Justin Melton na hinugot ni coach Tim Cone upang humalili sa pagliban sa laro ni PJ Simon na masakit ang likod.
Umungos din si Mixers reigning Best Import Marcus Blakely ng 25 puntos, 18 rebounds at five blocks.
Dalawang oras bago ang laro ng San Mig ay nalaman ni Cone na hindi makakapaglaro ang kanyang pambatong point guard na si Simon.
(ARABELA PRINCESS DAWA)
