HATAW! D'yaryo ng Bayan hatawtabloid.com
IPRINESENTA sa media ni Quezon City District Director, Chief Supt. Richard Albano ang 670 grams ng shabu na nagkakahalaga ng P1.5 milyon, nakompiska mula sa suspek na si Jody Daranciang, 30, ng 23-B, Road 10, Brgy. Bagong Pag-asa, Quezon City, ng mga operatiba ng District Anti-illegal Drugs – Special Operations Task Group (DAID-SOTG), sa pangunguna ni S/Insp. Roberto Razon, Sr. (RAMON ESTABAYA)
NADAKIP ng mga operatiba ng Quezon City Police District Masambong Police Station 2 ang babaeng tulak, makaraang makompiskahan ng 670 gramong shabu, may street value P1.5 million kahapon ng umaga.
Sa natanggap na ulat ni Chief Supt. Richard Albano, QCPD director, mula kay Supt. Pedro Sanchez, hepe ng Masambong PS 2, kinilala ang suspek na si Jody Daranciang alyas “Jo”, 30, ng San Isidro, Nueva Ecija at residente ng 23 B Road 10, Barangay Bagong Pag-asa.
Nauna rito, nakatanggap ng sumbong ang opisina ni Sanchez hinggil sa pagwawala ng suspek na hinalang lango sa droga, sa Palawan St., Baranagy Sto. Cristo.
Agad nirespondehan ng mga operatiba ang sumbong sa pangunguna ni Sr. Insp. Emmanuel Bolina kaya nadakip si Daranciang.
Nang komprontahin ang babae nakuha sa kanyang bag ang walo sachet ng shabu umaabot sa 670 gramo.
Nakatakdang kasuhan ng paglabag sa anti-dangerous drugs law ang suspek sa QC Prosecutors Office.
(Almar Danguilan)
