Suicide sa Laoag udyok ng bad spirits?

LAOAG CITY – Nababalot ng takot ang mga residente sa isang barangay sa Lungsod ng Laoag dahil sa sunod-sunod na pagpapakamatay ng mga residente roon.

Ayon kay Brgy. Chairman Nestor Villa ng Brgy. 48-B Cabungaan sa Laoag City, naaalarma sila dahil pang-apat na ang lalaking nagbigti kamakalawa na si Michael Tangonan.

Aniya, base sa naipaparating sa kanyang mga balita, may masasamang espiritu na kumukumbinsi sa mga biktima na magpakamatay.

Habang ayon kay Brgy. Kagawad Marie Rose Factores de la Cruz, ito ang dahilan kung kaya’t nag-pray over sila sa lugar na pinaniniwalaan ng mga residente na pinamumugaran ng masasamang espiritu.

Habang nagdarasal aniya sila ay may naramdaman siyang kakaiba at parang tumatayo ang kanyang balahibo.

Sa kabilang dako, sinabi niyang nasaksihan niya mismo nang sinaniban ng isa sa mga nagpakamatay na biktima ang kanyang kapatid.

Habang nasasaniban aniya ang biktima ay boses ng namatay na ang lumalabas, at may mga pagkakataon na nagbabago ang boses na tila demonyo ang nagsasalita.

Sa ngayon, natatakot ang mga residente na baka isa sa kanilang pamilya ang susunod na maging biktima.