HATAW! D'yaryo ng Bayan hatawtabloid.com
TODAS ang 20-anyos crew ng Burger Machine nang saksakin ng dating ka-live in, nang maaktohang pinapaypayan ng karelasyon niyang pulis sa Mariones, Maynila, iniulat kahapon.
Kinilala ang biktimang si Jerica Sioco, ng B-5 Bonifacio Street, Magsaysay Village, Tondo.
Sa ulat ng pulisya, namatay si Sioco habang nilalapatan ng lunas sa Gat Andres Bonifacio Medical Center, sanhi ng pitongsaksak sa katawan.
Sa ulat, kinilala ang suspek na si Richard Ryan, 28, ka-live in ng biktima, laborer, ng 731 D Pampanga St., Gagalangin ,Tondo, agad naaresto ng mga tauhan ng Moriones PS 2, nakapiit sa Manila Police District-Homicide Section.
Ayon kay PO3 Glenzor Vallejo ng Manila Police District-Homicide Section, naganap ang pananaksak sa loob ng Burger Machine stand, harap ng MPD Moriones PS 2, nasa J. Nolasco kanto ng Morga streets, Tondo, dakong 5:45 a.m.
Nabatid, naabutan ng suspek ang biktima na pinapaypayan ng karelasyon niyang pulis sa loob ng Burger Machine stand at bago siya nakalapit ay mabilis na nakaalis ang pulis.
Kinausap ng suspek ang biktima na bumalik na sa kanyang piling para maalagaan ang kanilang anak, pero nagmatigas si Sioco, hanggang nagtalo ang dalawa.
Habang nagkakasagutan, nagdilim ang pag-iisip ni Ryan at kanyang pinasok sa loob ng burger machine ang biktima saka pinagsasaksak hanggang mapatay.
(leonard basilio)
