HATAW! D'yaryo ng Bayan hatawtabloid.com
ARESTADO ang isang Filipino-American sa Ninoy Aquino International Airport (NAIA) terminal 1 nang madiskubre sa kanyang bagahe ang isang kalibre .22 na may limang bala, ayon sa Police Aviation Security Unit kahapon.
HInahabol ng Fil-Am na si Wilfredo Manahguit Varilla, 56, ang kanyang maagang flight sa Delta Airlines patungong Nagoya, Japan nang pigilan ng dalawang security personnel na sina Fidencio Vegara, Jr., at Josua Streit, nang lumitaw ang imahe ng baril sa X-ray scanner.
Si Varilla ay patungong Estados Unidos nang arestohin ng aviation police.
Batay sa salaysay ni Varilla sa pulisya, hindi siya makapaniwala kung paano nailagay ang baril sa loob ng kanyang green trolley bag.
Mariin niyang itinanggi na pag-aari niya ang baril at sinabi sa Aviation police na mula iyon sa kanyang kaibigan at ipinakita lamang sa kanya habang nagbabakasyon sa Bulacan.
Kasong illegal possession of firearm ang isinamapa ng pulisya laban sa kanya sa Pasay prosecutor’s office.
Samantala, magsasagawa ng sariling imbestigasyon ng Manila International Airport Authority (MIAA) tungkol sa insidente.
Ayon sa MIAA, magsasagawa sila ng review kung paano naipasok ni Varilla ang baril sa initial security check sa kabila ng X-ray security machines na nakalagay sa bawat gate ng departure ng NAIA terminal 1.
(GLORIA GALUNO)
