Away pamilya, tatay patay

PINAGBABARIL hanggang mapatay ang 38-anyos truck driver ng pinsan ng kanyang misis bunsod ng hidwaan sa pamilya sa Tondo, Maynila kahapon.

Kinilala ni police officer Jonathan Bautista ang biktimang si Jose Gregorio Villa,  ng 357 Capulong St., hindi na umabot nang buhay sa Mary Johnston Hospital

Habang tinutugis ng mga awtoridad ang suspek na si Reynaldo Quizon,  ng 357 Victor Lopez Compound.

Ayon sa misis ng biktima na si Anna Rose Villa, 35, nagsimula ang alitan nang magkasakitan sila ng kanyang pa-mangkin na si Melody, anak ng pinsan niyang si Quizon, nitong Abril 16.

Bilang pagkampi ni Quizon sa kanyang anak, pinukpok ng suspek ng walis-tingting sa ulo si Anna Rose.

Nang malaman ito ng biktima, kinompronta niya ang suspek at hinamon ng suntukan ngunit hindi siya pinatulan.

Dakong 7:30 a.m. kahapon habang nag-iigib ng tubig sa tapat ng kanilang bahay ang biktima, nilapitan siya ng suspek saka binaril ng dalawang beses habang nakatalikod.

Pagkaraan ay mabilis na tumakas ang suspek bitbit ang ginamit na baril.

– LEONARD BASILIO

(May kasamang ulat nina CAMILLE BOLOS, NIKKI-ANN CABALQUINTO, ANTONIO MAAGHOP JR., BHENHOR TECSON, at LARA LIZA SINGSON)