Mason todas sa PNR train (Dalawang paa naputol)

BINAWIAN ng buhay ang 43-anyos mason makaraang mahagip ng PNR train sa Antipolo St., kanto ng Jose Abad Santos St., Sta Cruz, Maynila kahapon ng umaga.

Ang biktimang si Max Padon ng Fairview, Quezon City ay nalagutan ng hininga habang nilalapatan ng lunas sa Ospital ng Tondo.

Ayon kay Lito Liaban, foreman ng Aleway Construction, nagsasagawa sila ng rip-rapping sa flood control canal sa tabi ng riles nang tumawid ang biktima dakong 7 a.m.

Ngunit nadulas ang biktima sa riles kaya nahagip ng tren na patu-ngong Bicutan mula sa Tutuban station sa Maynila.

Humihinga pa ang biktima nang daluhan ngunit putol na ang isang paa habang durog ang isa pa at may sugat sa ulo.

Isinugod ang biktima sa nabanggit na ospital ngunit dakong 10 a.m. kahapon ay binawian ng buhay.

Nitong Abril 7, isang lalaki ang namatay makaraang mabundol at makaladkad ng PNR train sa Sampaloc, Maynila.

– LEONARD BASILIO (May kasamang ulat nina CAMILLE BOLOS, NIKKI-ANN CABALQUINTO, ANTONIO MAAGHOP, JR., BHENHOR TECSON, at LARA LIZA SINGSON)