HATAW! D'yaryo ng Bayan hatawtabloid.com
PAALAM RUBIE GARCIA. Bago ilibing idinaan muna sa Mendiola ng iba’t ibang grupo ng mga mamamahayag ang kabaong ng pinaslang na reporter na si Rubie Garcia upang ipaabot kay Pangulong Benigno “Noynoy” Aquino III ang iginigiit na hustisya para sa biktima na pinatay sa kanyang bahay sa Bacoor, Cavite.
(BONG SON)
ITINANGGI ng Malacañang na binabalewala ang kaso ng pamamaslang kay Rubie Garcia, isang mamamahayag sa CALABARZON.
Reaksyon ito ng Malacañang sa pahayag ng mga kritiko na mistulang nakalimutan na ang kaso dahil wala pa ring naaaresto ang mga awtoridad at hindi pa rin malinaw ang motibo ng pagpatay.
Bitbit ang kabaong ni Garcia, nag-rally ang grupo ng mamahayag sa Mendiola upang iparating sa Malacañang ang kanilang hinaing.
Sinabi ni Communications Sec. Sonny Coloma, patuloy nilang sinusubaybayan ang kaso ng pagpatay sa lady reporter.
Ayon kay Coloma, malinaw ang atas ni Pangulong Benigno “Noynoy” Aquino III sa Task Force Tugis na mas paigtingin ang paghahanap sa mga responsable ng pagpatay sa mga kagawad ng media.
Kasabay nito, kinontra ng Malacañang ang pahayag ng NPC na walang nangyari sa 20 kaso ng pagpatay sa mga taga-media sa pagsasabing may nahuli na sa pagpatay sa brodkaster na si Gerry Ortega at patuloy pa ring pinaghahanap sina dating Palawan Gov. Joel Reyes at kanyang kapatid.
(KARLA OROZCO)
