Parks lalaro na sa NLEX

INAASAHANG lalaro na sa North Luzon Expressway ngayong linggong ito si Bobby Ray Parks para makatulong ang kampanya nito sa PBA D League Foundation Cup.

Sinabi ng team manager ng Road Warriors na si Ronald Dulatre na limang mga manlalaro ng koponan, kasama si coach Boyet Fernandez, ay nasa Lithuania ngayon para sa training camp ng San Beda bilang paghahanda nito para sa NCAA Season 90.

“Actually, anytime he can play with us already. He is finalizing his school commitments. We want him to join practice para fair din naman sa iba,” wika ni Dulatre. “I’m confident na he can play na this month.”

May tatlong panalo at wala pang talo ang NLEX ngayong torneo.

Plano rin ng NLEX na dalhin si Parks sa PBA bilang direct-hire recruit kung papayagan nitong makapasok sa liga bilang expansion team.

Malalaman na sa Huwebes, Abril 10, ang magiging tadhana ng NLEX, Blackwater at Kia Motors na parehong haharap sa PBA board of governors sa espesyal na pulong nito.

(JAMES TY III)