Fajardo lalaro sa SMB ngayon

SASABAK na sa unang pagkakataon para sa San Miguel Beer ang sentrong si Junmar Fajardo mamaya sa PBA Commissioner’s Cup kontra Talk ‘n Text sa Smart Araneta Coliseum.

Ayon sa head coach ng Beermen na si Melchor “Biboy” Ravanes, ilang minuto lang ang ibibigay niya kay Fajardo na kagagaling lang sa kanyang pilay sa paa.

Napilay si Fajardo sa ensayo ng Beermen noong Marso 2 kaya hindi siya ginamit ni Ravanes sa unang dalawang panalo ng SMB sa torneo.

“Kahapon lang nag-ensayo si Junmar sa amin,” pahayag ni Ravanes.  “Iniisip ko lang, yung game shape at kondisyon niya during the actual game. We’re happy to see him play again and it depends on how he moves sa warm-up sa mga minuto na gagamitin namin siya.”

Malaking tulong para sa Beermen ang pagbabalik ni Fajardo na napiling Best Player noong Philippine Cup dahil sa kanyang mga averages na 17 puntos at 16 rebounds bawat laro.

Makakasama ni Fajardo sa ilalim ang bagong import ng Beermen na si Kevin Jones.

“Mga 80 per cent akong nasa kondisyon na. Strengthening lang ang kailangan ko. May kaunting sakit sa paa pero talagang lalaro ako. Handa ako kahit ilang minuto lang, okey sa akin,” ani Fajardo.

(James Ty III)