Sarah at Matteo, may unawaan na (Suportado kasi ang actor ng Popsters, may taga-paghatid balita pa)

MUKHANG may unawaan na sina Sarah Geronimo at Matteo Guidicelli na ayaw lang nilang ipaalam sa lahat para hindi na sila intrigahin pa.

Nakarating sa amin na noong premiere night ng pelikulang Saturday Night Chills na pinagbibidahan nina Joseph Marco, Rayver Cruz, at Matteo na kasama sa Cinema One Originals na ginanap sa Robinson’s Galleria ay dumalo ang Popsters ni Sarah.

Tinanong namin ang nagkuwento kung naroon si Sarah, “wala po, mga Popster lang to support Mat( tawag nila sa aktor),” sabi sa amin.

Naisip namin kung walang usapan o unawaan sina Sarah at Matteo ay bakit suportado ng mga tagahanga ng singer/actress ang aktor?

Bukod dito ay ang mga loyalistang tagasuporta pa raw ni Sarah ang nagbabalita kay Matteo tungkol sa kanilang idolo ganoon din daw sa aktor na ibabalita naman nila sa dalaga.

Sabi namin, okay lang na hindi nila aminin, lalabas din naman ang totoo pagdating ng araw dahil ganito rin naman ang nangyari noon kina Rayver at Gerald Anderson na tigas ng katatanggi ni Sarah, pero napaamin din pagkatapos nilang maghiwalay.

Tinanong namin ang aming kausap kung bakit hindi dumalo si Matteo sa nakaraang Perfect 10 concert ni Sarah sa Araneta Coliseum noong nakaraang linggo?

“May taping po si Mat ng ‘Galema’, hindi po siya pinayagang umalis sa taping,” sabi sa amin.

‘Yun na!
Reggee Bonoan