HATAW! D'yaryo ng Bayan hatawtabloid.com
IPINAHAYAG ng Alas Pilipinas ang kanilang pagdating sa pandaigdigang entablado matapos ang isang nakakakabog na panalo laban sa kasalukuyang kampeon ng Africa na Egypt, 29-27, 23-25, 25-21, 25-21, na nagpapanatili ng kanilang pag-asang makapasok sa Round of 16 ng 2025 FIVB Volleyball Men’s World Championship nitong ‘di malilimutang Martes ng gabi sa SM Mall of Asia Arena sa Pasay City.
Malaki ang naging papel ng home crowd sa unang panalo ng Philippine Men’s National Volleyball Team sa World Championship, na nagtulak sa koponan mula ika-89 patungong ika-77 sa FIVB rankings—isang kahanga-hangang pag-akyat na pinanday ng dedikasyon, tibay ng loob, at walang sawang suporta.
Bilang host ng torneo, napanatili ng Alas Pilipinas ang kanilang record sa Pool A sa 1-1 na may tatlong puntos, na nagpatabla sa lahat ng apat na koponan sa grupo at nagbukas ng pintuan para sa isang kapana-panabik na do-or-die na huling araw ng pool play sa Huwebes.
Dalawa lamang sa grupo ang uusad sa Round of 16. Makakaharap ng Filipinas ang world No. 14 Iran sa ganap na 5:30 p.m., habang maglalaban ang Egypt at Tunisia sa 1:30 p.m.
“Humiga ako sa sahig dahil sobrang saya ko. Hindi lang ito para sa Filipinas; kasama ko ang team na ito ng 15 o 16 buwan. Nakita ko kung paano sila nag-improve, at hinintay ko ang sandaling ito — na manalo ng isang laban at ipakita sa lahat kung gaano kami lumago sa loob ng 16 buwan. Nangyari na ‘yon ngayon,” ani head coach Angiolino Frigoni, na napaluhod sa sahig sa labis na tuwa.
Nagsimula ang tagumpay sa unang set nang nailigtas ng FPilipinas ang apat na set point kontra sa world No. 21 Egyptians. Sina Bryan Bagunas, Kim Malabunga, at Leo Ordiales ang bumida sa tatlong magkasunod na puntos — isang power tip, isang block, at isang ace — na nagtapos sa set sa iskor na 29-27.
“Nang manalo kami sa unang set, pakiramdam namin iyon na ang pinakamagandang laro sa buhay namin. Doon kami nagsimulang maniwala na kaya naming manalo,” ani Marck Espejo.
Bumawi ang Egypt sa ikalawang set, 25-23, ngunit nanatiling kalmado ang Alas Pilipinas. Sa ikatlong set, humiwalay ang Filipinas mula sa 20-all na tie, kung saan si Espejo ay nag-ambag ng tatlong puntos sa isang 5-1 run upang makuha ang set, 25-21.
Sa ikaapat na set, ipinakita ng koponan ang kanilang composure at determinasyon, tinanggihan ang bawat pagtatangkang makabawi ng Egypt. Tinapos ni Bagunas ang laban sa isang matinding spike laban sa tatlong blocker, habang si Espejo ay nagtala ng isang crucial block kay Abdelrahman Elhossiny upang makuha ang makasaysayang panalo sa loob ng dalawang oras at labing-pitong minuto.
“Sobrang saya ko kasi hindi lang ito bounce-back performance para sa akin—ito ay bounce-back win para sa Filipinas,” ani Leo Ordiales, 22 anyos, na nakabawi mula sa dalawang puntos kontra Tunisia upang makapagtala ng 21 puntos mula sa 19 spikes at dalawang aces.
Pinangunahan ni Bagunas ang laban sa 25 puntos mula sa 23 spikes at dalawang blocks. Mas kapansin-pansin din ang suporta ng mga kakampi koumpara sa mga nakaraang laro. Nagdagdag si Espejo ng 13 puntos mula sa siyam na spikes, tatlong blocks, at isang ace, habang sina Kim Malabunga at Lloyd Josafat ay may pito at limang puntos, ayon sa pagkakasunod.
Nagpakita rin ng mahusay na setting si Owa Retamar na may 39 porsiyentong setting efficiency, na tumulong sa Filipinas mula sa pagiging “deepest diver” tungo sa pagiging “highest jumper” ng torneo.
Para sa Egypt, si Seifeldin Hassan Aly ang nanguna na may 15 puntos, habang si Mohamed Osman Elhaddad ay may 14, ngunit hindi ito sapat upang pigilan ang makasaysayang tagumpay ng hometeam. (Detalye mula sa FIVB Media)
Caption:
ANG SPIKE ni Bryan Bagunas ng Alas Pilipinas ang nagpalusot sa bola sa pagitan ng braso ni Seif Abed (No.14) ng Egypt. Gumawa si Bagunas ng 25 puntos, habang si Leo Ordiales (No.17) may ambag na 21 puntos at si Espejo (No.15) ay may 13 puntos sa kanilang panalo, 29-27, 23-25, 25-21, 25-21 kontra Egypt na isang makasaysayang panalo sa 2025 FIVB Volleyball Men’s World Championship nitong Martes ng gabi sa SM Mall of Asia Arena sa Pasay City. (HENRY TALAN VARGAS)
KASAMANG nakisaya sina AVC President Tats Suzara at Sen. Pia Cayetano. (FIVB photo)
