Galaw nakaiindak, Meant To Be senti ng Innervoices

RATED R
ni Rommel Gonzales

HINDI inaasahan ang muli naming pagkikita ng kaibigang si Albert “Abot” Nocom sa Tunnel Bar sa Parqal sa Parañaque City.

Naimbita kasi kami ni Atty. Rey Bergado na leader at keyboardist ng grupong Innervoices sa first ever gig nila sa bar.

Pagdating namin, boses agad ni Abot ang narinig naming tumatawag sa aming pangalan, sabay-tanong ng, ‘Ano ang ginagawa mo rito?’

Sagot namin, inimbita nga kami ni Atty. Bergado.

Sa tanong naman namin kay Abot kung ano rin ang ginagawa niya sa Tunnel, simpleng sagot niya, ‘Sa akin ito, eh.’

Doon na namin napagtanto kung bakit may post si Kookoo Gonzales, na partner ni Abot, about Tunnel. Si Abot pala ang may-ari ng Tunnel Bar na class at sosyal.

At dati rin ay nag-gig sa Tunnel si Diego Gutierrez na anak nina Lotlot de Leon and former husband Ramon Christopher

na matalik naming kaibigan nina Abot, Kookoo, at Lotlot.

Going back to Innervoices, as always ay nag-enjoy kami at humataw ng sayaw (at kain at inom?) habang pinanonood ang grupo na bukod kay Atty. Rey ay kinabibilangan din nina Patrick Marcelino(lead vocalist), Joseph Cruz (keyboard), Joseph Esparrago (drums), Alvin Hebron (bass), at Rene Tecson (lead guitar).

Nakaka-senti ang kanta nilang Meant To Be (na nilikha mismo ni Atty. Rey) at nakaiindak naman ang Galaw, habang ang iba pa nilang songs ay ang Idlip, T. H. A. L. (Tubig, Hangin, Apoy, Lupa), Saksi Ang Mga Tala, Handa Na Kitang Mahalin, at ang Sayaw Sa Ilalim Ng Buwan.

At bukod sa Tunnel Bar ay napapanood ang Innervoices sa 19 East Bar and Restaurant (na pag-aari ni Wowee Posadas) at sa Noctos sa Scout Tuason sa Quezon City, sa Hard Rock Café sa Glorietta sa Ayala, at sa Aromata sa Scout Lazcano, QC.