Mula Israel, Jordan, Palestine, at Qatar
31 INILIKAS NA OFWs NAKAUWI NA SA BANSA

ni NIÑO ACLAN

NAKAUWI na sa bansa ang 31 repatriated overseas Filipino workers (OFWs) o ang unang batch sa gitna ng nagpapatuloy na tensiyon sa pagitan ng Israel at Iran.

Sakay ang mga naturang OFWs ng Qatar Airways 934 na dumating sa Ninoy Aquino International Airport (NAIA) terminal 3 pasado 7:50 kagabi kasama si Migrant Workers Secretary Hans Leo Cacdac.

Sa naturang 31 OFWs, 26 ay mula sa Israel, tatlo mula sa Jordan, isang mula sa Palestine, at 1 mula sa Qatar.

Sinagot ng pamahalaan ang kanilang plane ticket, transit visa, transportasyon, at temporary accommodation.

Bukod dito, ang bawat OFW ay makatatanggap ng tulong pinansiyal na P75,000 mula sa Overseas Workers and Welfare Administration (OWWA) at sa Department of Migrant Workers (DMW).

Mayroon din tulong ang bawat OFW mula sa Department of Social Worker and Development (DSWD), Department of Health (DOH) at Technical Education and Skills Development Authority (TESDA).

Tiniyak ng pamahalaan na dokumentado man o hindi ang isang Pinoy na nais nang makabalik ng bansa dahil sa apektado ng tensiyon sa pagitan ng dalawang bansa ay tutulungan na magkaroon ng travel document para sa kanlang kaligtasan.

Binigyang-linaw ng pamahalaan na nagkaroon ng pagbabago sa oras ng flght dahil sa mga banta ng pinakakawalang missiles sa himpapawid.