12 smuggled na SUV sa US nasabat ng BoC

NASABAT ng mga tauhan ng Bureau of Customs – Intelligence and Investigation Services (BOC-CIIS) ang dalawang container van sa Manila International Container Port (MICP) galing sa Estados Unidos at may kargang 12 sports utility vehicle (SUV).

Ayon kay BOC-CIIS Director Verne Enciso, isinailalim sa X-ray imaging sa MICP ang dalawang shipment makaraang makatanggap ng impormasyon na naglalaman ito ng “misdeclared and undeclared items.”

Natuklasan sa ginawang X-ray imaging ang 12 SUV sa loob ng kargamento na unang idineklarang naglalaman ng car accessories and supply.

Dahil dito ayon kay Enciso, isinagawa ang 100% physical examination sa mga container van.

Laman ng dalawang container vans ang isang unit ng 1996 Acura Integra; 3 units ng 1998 Honda Civic: 1 unit ng 1999 Honda Civic; 4 units ng 2000 Honda Civic; 1 unit ng 2002 Honda S2000; 1 unit ng 2004 Honda S2000; 1 unit ng 2007 Mini Cooper S.

Naka-consign ang kargamento sa Danesh Consumer Goods Trading mula sa United States.

Ayon kay Deputy Commissioner for Intelligence Group Juvymax Uy, nakatanggap sila ng impormasyon na sangkot sa pagpupuslit ng mga sasakyan at mga bahagi nito ang kargamento kaya trinabaho ng intelligence unit ng BOC sa nakalipas na mga linggo.

Tiniyak ni BOC Commissioner Bien Rubio na mananagot ang mga nasa likod ng smuggling operation.

Malinaw aniya itong paglabag sa Section 1400 ng Customs Modernization and Tariff Act.