HATAW! D'yaryo ng Bayan hatawtabloid.com
DINAKIP ng mga awtoridad ang isang 19-anyos lalaki matapos tangkaing kikilan ang isang 18-anyos babae kapalit ng hindi niya paglalabas ng umano’y mga sex video ng huli, sa bayan ng General Nakar, lalawigan ng Quezon, nitong Martes, 20 Mayo.
Ayon sa imbestigasyon, pinipilit hingan ng suspek na kinilalang si alyas Jade ng P5,000 ang biktimang si alyas Neca kapalit ng hindi niya paglalabas ng mga maseselang larawan at video sa social media.
Anang pulisya, nakatanggap ng mga mensahe ang biktima kalakip ang mga hubad na larawan at video bilang patunay na nasa pag-iingat ng suspek.
Hindi nag-atubiling magsampa ng reklamo ang biktima sa pulisya na siyang nagsagawa ng entrapment operation at nagresulta sa pagkakadakip ng suspek matapos matanggap ang pera sa pamamagitan ng kilalang e-wallet.
Narekober mula sa suspek ang limang P1,000 bill at cellphone na pinaniniwalaang kaniyang gamit sa panggigipit sa biktima.
Kasalukuyang nasa kustodiya ng pulisya ang suspek na nahaharap sa mga kasong cybercrime at robbery-extortion.
