HATAW! D'yaryo ng Bayan hatawtabloid.com
NATAGPUANG sunog na sunog ang magpinsang paslit na unang iniulat na nawawala sa naganap na sunog sa Sta. Mesa kamakalawa ng hapon, 19 Mayo.
Iniulat na ang magpinsang paslit ay nakulong sa nasusunog nilang tahanan nang maganap ang sunog.
Hindi pa pinangalanan ang mga biktima na ayon sa mga awtoridad ay hindi na makilala dahil sa matinding pagkasunog ng kanilang mga katawan.
Batay sa ulat ng Manila Bureau of Fire Protection (BFP), dakong 3:42 ng hapon nang magsimulang sumiklab ang sunog sa tahanang pagmamay-ari ng isang alyas Nora, sa Road 12, Phase 1, Brgy. 628, sa Sta. Mesa.
Ayon kay Fire Sr. Insp. Cesar Babante, Station 2 commander ng BFP-Manila, unang iniulat na nawawala ang mga biktima.
Ang mga natupok na bangkay ay natagpuan dakong 10:14 ng gabi sa ilalim ng mga debris ng nasunog na bahay.
“Meron po tayo naitala, dalawang casualty. Ito po ay na-retrieve na namin at nadala na po sa punerarya. Beyond recognition na po. Kasi totally burned na po talaga,” ani Babante.
Nahirapan din aniya sila sa pag-apula ng apoy dahil sa malakas na hangin sa kasagsagan ng sunog.
Anang BFP, umabot sa ikaapat na alarma ang sunog bago naideklarang fire under control dakong 6:50 ng gabi. Tuluyang naapula ang sunog 3:05 ng madaling araw ng Martes.
Sa pagtaya ng mga awtoridad, nasa 220 pamilya ang apektado ng sunog na tumupok sa 50 kabahayan.
Sa imbestigasyon, sinabing posibleng ‘electrical’ ang pinagmulan ng sunog na tinatayang P400,000 halaga ng ari-arian ang napinsala.
