HATAW! D'yaryo ng Bayan hatawtabloid.com
ARESTADO ang isangChinese national ng mga operatiba ng Pasay City Police Station sa tangkang pagpapadala ng parcel na naglalaman ng ilegal na droga sa isang courier company, sa Pasay City.
Kinilala ang suspek na si Chao Meng, 38 anyos, na nasakote ng mga tauhan ng Sub-station 10 ng Pasay Police, 9:45 ng gabi nitong 27 Abril 2025.
Aktong magpapadala ng ilegal na droga sa isang forwarding company sa isang mall sa Pasay ang suspek.
Nabuking ng mga empleyado ng forwarding company ang 54.8 gramo ng shabu, katumbas ng P372,000 halaga, na nakalagay sa isang pulang envelope para ipadala sa China.
Kabilang sa nakuha ang mga dokumentadong ebidensiya gaya ng isang reusable FedEx plastic pack; shipment form; deeds of agreement, isang cellphone, at identification card ng suspek.
Isinailalim sa kustodiya ng Station Drug Enforcement Unit (SDEU) ang suspek, habang nakabinbin ang inquest proceedings sa Pasay City Prosecutor’s Office sa paglabag sa Republic Act 9165 (Comprehensive Dangerous Drugs Act of 2002).
