HATAW! D'yaryo ng Bayan hatawtabloid.com
ARESTADO sa mga awtoridad ang isang 23-anyos tricycle driver dahil sa alegasyong pagnanakaw ng P4-milyong cash na nakalaan para sa mga proyekto ng Sangguniang Kabataan (SK) sa Brgy. Pinagbuhatan, sa lungsod ng Pasig.
Ayon sa ulat mula sa pulisya, nilooban ng suspek na kinilalang si alyas Jomar, kasama ang kaniyang kasabwat na kinilalang si alyas JD, ang Pinagbuhatan Child Development Center nitong Linggo, 27 Abril.
Nadiskubre ng ilang opisyal ng SK na winasak ang cash vault na pinagtataguan ng pondo.
Lumabas sa imbestigasyon na inakyat ng mga suspek ang dingding ng isang bahay upang makapasok sa gusali saka sinira ang kisame ng ikalawang palapag nito upang makapasok sa tanggapan ng Sangguniang Kabataan.
Bukod sa salapi, tinangay din ng mga suspek ang ilang CCTV camera upang pagtakpan ang kanilang ginawang krimen saka tumakas sakay ng tricycle na minamaneho ni alyas Jomar.
Agad nagsagawa ng backtracking ang pulisya at nagkasa ng follow-up operation na nagresulta sa pagkakadakip kay alyas Jomar habang nananatiling nakalalaya ang kaniyang kasabwat.
