P74.8 milyong shabu nasabat sa Caloocan

NAKOMPISKA ng mga operatiba ng Philippine National Police-Drug Enforcement Group (PDEG) ang nasa P74.8 milyong halaga ng shabu sa isinagawang buybust operation nitong Linggo ng gabi sa Caloocan City.

Ayon kay PDEG acting chief Col. Rolando Cuya, nadakip ang mga high value individuals (HVIs) na sina alyas Johary, 26 anyos, at Am­bulo, 25, sa Brgy. Amparo, North Caloocan.

Nabatid na ‘under surveillance’ ang mga suspek hanggang makompirma ang kanilang bagong transaksiyon.

Hindi nakapalag ang mga suspek nang masakote sa buybust operation.

Nakuha sa mga suspek ang nasa 11,000 gramo ng hinihinalang shabu na nagkakahalaga ng P74,800,000 kasama ang mga non-drug paraphernalia.

Dinala sa Amparo Sub-Station 15 ang mga suspek na nahaharap sa kasong paglabag sa Comprehensive Dangerous Drugs Act habang dinala sa Northern Police District, Crime Laboratory para sa pagsusuri ang mga nakompiskang ilegal na droga.

Pinuri ni Cuya  ang kanyang mga tauhan sa matagumpay na police operations.

Aniya, magsilbi itong motibasyon sa mga pulis para patuloy na labanan ang pagkalat at bentahan ng ipinagbabawal na droga.