Vic Sotto idedemanda si Darryl Yap

SHOWBIZ KONEK
ni Maricris Valdez Nicasio

KAKASUHAN daw ni Vic Sotto ang kontrobersiyal na direktor, si Darryl Yap. Kaugnay ito ng inilabas na teaser ng kontrobersiyal na direktor sa latest movie niyang may titulong The Rapists of Pepsi Paloma.

Ayon sa ulat ng TV5, maghahain ng reklamo ang TV host-actor laban kay direk Darryl matapos mabanggit sa teaser ang pangalan TV at movie icon sa biopic ng yumaong aktres na si Pepsi.

Ihahain daw ang reklamo sa Muntinlupa City Regional Trial Court ngayong araw, January 9, ayon sa legal counsel ni Vic. Walang nabanggit sa report kung anong eksaktong mga kaso ang isasampa ni Bossing Vic laban sa direktor.

Sa kabilang banda, tila hindi nababahala si direk Darryl sa balitang magdedemanda si Vic. 

Ipinost kasi ng direktor sa kanyang Facebook page ang report ng TV5 tungkol sa paghahain daw ng kaso laban sa kanya.

Ibinahagi rin niya ang umano’y media advisory tungkol sa paghahain ng reklamo ni Bossing hinggil sa kontrobersiya.

Walang caption na inilagay si direk Darryl sa kanyang post.