Motorsiklo sinikwat ‘tirador’ natunton sa mga kuha ng CCTV

NADAKIP ng mga awtoridad ang isang lalaki matapos nakawin ang isang nakaparadang motorsiklo sa Sta. Cruz, lungsod ng Maynila, nitong Martes, 12 Nobyembre.

Nakita sa kuha ng CCTV na nakamasid ang lalaki sa lugar at maya-maya ay kanyang nilapitan ang nakaparadang motorsiklo saka dali-daling itinulak.

Nakita sa kuha ng CCTV na tumigil ang suspek sa gilid saka tinanggal ang plaka ng motorsiklo, sinipat niya muna ang kabilang kalsada bago binuhat ang motor at isinampa sa bangketa.

Ayon kay P/Maj. Philipp Ines, tagapagsalita ng Manila Police District (MPD), ang modus operandi ng suspek ay ililipat muna ang motorsiklo at tatakpan saka ilalabas at itatakas kapag wala nang naghahanap.

Ayon sa biktimang kinilalang si Nicolas Tafalla, barangay treasurer, hindi pa niya tapos hulugan ang motorsiklo at ginagamit niya ito sa kaniyang trabaho.

Sa tulong ng mga nakalap na kuha ng CCTV, agad natunton ang suspek at narekober ang ninakaw na motorsiklo.

Dagdag ni Ines, dati nang nakulong sa kasong homicide ang suspek samantala hindi nasasampahan ng kaso kaugnay sa pagnanakaw ng motorsiklo dahil hindi nagpapatuloy ang kaniyang mga naging biktima sa paghahain ng reklamo.

Depensa ng suspek, nagmalasakit lang siyang itabi ang motor dahil nakabalagbag umano sa daan.

Sinampahan ng reklamong paglabag sa RA 10883 o New Anti-Carnapping Act of 2016 ang suspek.

Nagpaalala ang pulisya na huwag iparada ang motorsiklo sa madilim na lugar at lagyan ito ng kandado upang hindi manakaw.