HATAW! D'yaryo ng Bayan hatawtabloid.com
ARESTADO ang dating child actor na si John Wayne Sace itinurong responsable sa pagpaslang sa kaniyang kaibigan sa lungsod ng Pasig, nitong Lunes, 28 Oktubre.
Ayon sa mga awtoridad, natagpuang wala nang buhay at may apat na tama ng bala baril sa kaniyang katawan ang 43-anyos biktima matapos makarinig ang kaniyang mga kaanak ng mga putok ng baril sa Brgy. Sagad, sa nabanggit na lungsod, dakong 7:30 pm kamakalawa.
Agad naiulat sa pulisya ang insidente na sinundan ng pagkakadakip kay Sace na natagpuan sa isang hotel sa naturang lungsod.
Sa imbestigasyon, matagal nang may alitan ang biktima at ang suspek na maaaring motibo sa pamamaslang.
Dinala si Sace sa Eastern Police District Headquarters upang sumailalim sa paraffin test saka ibinalik sa kustodiya ng Pasig CPS.
Bago ang kaniyang pagkakaaresto, nakapag-post si Sace sa kaniyang Facebook na nagsasabing, “Nagtutulak kayo ng droga nang palihim ‘di ba? ‘Yung mga buhay na sinira n’yo? May kalaban laban ba? ‘Yung mga ninakawan n’yo? Meron? ‘Wag kayo pa-victim. Ilang beses n’yo na ko pinagplanohan katulad kagabi??? Ha di ba? ‘Pag umalis ako papatayin n’yo pamilya ko?”
Patuloy ang isinasagawang pagsisiyasat ng pulisya upang matukoy ang totoong motibo sa pamamaslang.
Noong 2016, nabalitang sugatan si Sace habang namatay ang kaniyang kasama nang paputukan ng baril ng hindi kilalang mga suspek na sakay ng motorsiklo sa lungsod din ng Pasig.
Gayondin, nakatala si Sace na sangkot sa paggamit ng ilegal na droga. (HNT)
