Geraldine Jennings thankful kay Jameson, inalalayan sa acting at kissing scene

SHOWBIZ KONEK
ni Maricris Valdez Nicasio

COMPLETE package nang maituturing si Geraldine Jennings. Magaling kumanta at umarte kaya naman kahit saan siya ilagay tiyak na panalo.

Inilunsad noong Biyernes ang bagong single ni Geraldine under Star Music, ang If I Will Ever Love Again at ang first starrer movie niyang Isla Babuyan. 

Isinulat ni Ogie Alcasid ang If I Will Ever Love Again at available na ito sa iba’t ibang streaming platforms.

Kasama naman ng half-Filipina, half-British artist sa pelikulang Isla Babuyan sina Jameson Blake, Paolo Gumabao, Dave Bornea, Lotlot de Leon, at James Blanco.

Idinirehe ito Abdel Langit, isinulat ni Jessie Vilabrille under Solid Gold Entertainment Production at LVD Talent Management (na pag-aari ng yumaong manager ni Geraldine na si Leo Dominguez), at co-producers sina Gina Jennings at Yohann Soyangco.

Ani Geraldine, sumailalim siya sa acting workshop sa loob ng isang taon bago sumabak sa pag-arte at sinimulan ang pag-shoot ng Isla Babuyan.

“Marami akong mga acting workshop in the US sa West Hollywood. I did it for one year.

“Then I had an acting workshop with Jo Macasa, a well-known acting coach here. I had it with her siguro for four months. I really felt prepared naman,” pagbabalita ni Geraldine.

Nang kumustahin ang unang pagsabak niya sa pag-arte, inamin nitong nahirapan siya sa dramatic scene. “May mga eksena na dramatic, nahirapan ako. Pero after two days, three days, sanay na ako. Mas natural na ang acting ko.

“Nakatulong sa akin si Miss Lotlot de Leon sa mga dramatic scene kasi na-feel ko ‘yung emotions niya,” anang magandang dalaga.

Nagpasalamat naman si Geraldine kay Ogie na nag-compose ng debut single niyang If I Will Ever Love Again, na ginamit ding official soundtrack ng Isla Babuyan.

Sa kabilang banda, pinuri naman ni Geraldine ang leading man niyang si Jameson. Anang dalaga, magaling ito pagdating sa acting at inalalayan siya sa kanilang kissing scene.

“Mabango siya,” nangingiting sabi ni Geraldine.

Hindi naman nagdalawang-isip si Geraldine sa kanilang kissing scene ni Jameson dahil katwiran niya, parte iyon ng istorya at dapat lamang sumunod siya sa kung ano ang hinihingi ng istorya.

Nang papiliin naman siya kung alin ang mas love niya o gustong gawin, acting o singing, sinabi nitong pareho niyang gusto at kaya naman niyang pagsabayin pareho.

Sinabi pa ni Geraldine na willing siyang magpabalik-balik ng ‘Pinas para sa kanyang singing at acting career.