Magulang tiwalang anak nasa kapitbahay
1-ANYOS PASLIT NA LALAKI NAHULOG SA BALON PATAY
PATAY ang isang taong gulang na paslit na lalaki matapos mahulog sa isang balon sa Brgy. Cabadiangan, sa lungsod ng Himamaylan, lalawigan ng Negros Occidental, nitong Biyernes ng umaga, 21 Hunyo.
Ayon kay P/Lt. Col. Anthony Grande, hepe ng Himamaylan CPS, natagpuang walang malay ang biktima sa loob ng isang balon may isang oras matapos magsimulang hanapin siya ng kanyang pamilya.
Ani Grande, inutusan ng kanilang mga magulang ang 12-anyos na anak na hanapin ang nakababatang kapatid upang kumain ng almusal ngunit hindi ito sinunod ng kuya ng biktima.
Nagpatuloy sa pagkain ng almusal ang pamilya sa paniniwalang nasa kapitbahay ang kanilang anak.
Nalaman lamang ng mga magulang na nawawala ang kanilang paslit na anak nang sunduin sa kanilang kapitbahay.
Dinala ang biktima sa pagamutan kung saan siya idineklarang wala nang buhay.
Nabatid na anim na metro ang layo mula sa bahay ng biktima ang walang takip na balon na may lalim na lima hanggang anim na talampakan.
Dagdag ni Grande, halos puno ng tubig ang balon dahil sa mga pag-ulan ng mga nakaraang araw.
