Diwata ayaw magseryoso sa lalaki — baka mawalan ako ng puhunan, maubos

SHOWBIZ KONEK
ni Maricris Valdez Nicasio

MALAYONG-MALAYO na talaga ang naabot ni Diwata mula sa pagiging walang-wala ngayo’y masasabing nakaluluwag-luwag na. Dagdag pa na kahit saan siya magpunta, talaga namang pinagkakaguluhan siya.

Nasaksihan namin ito sa katatapos na Vape festival ng Shift and Chillax na ginanap sa Metrowalk, Pasig City kung paanong pagkaguluhan at dami ng mga nagpapa-picture sa kanya.

Dagdag pa na isa siya sa kinuhang endorser ng Shift and Chillax at lumalabas na rin sa FPJ’s Batang Quiapo ni Coco Martin.

At sa naobserbahan namin pinagbibigyang lahat ni Diwata ang lumalapit sa kanya para magpa-picture at mag-interview. At naiintindihan namin ang inirason nito ukol sa mga pumupuna sa kanya na nagbago o lumaki na ang ulo.

“Siyempre iniintindi ko ang paresan ko, andoon ako para magtrabaho. Kung uunahin ko ‘yung mga nagpapa-picture paano na ang paresan ko? Paano na ang mga taong umaasa rin sa akin,” nakatwirang rason ni Diwata.

At lalong magiging abala si Diwata ngayon dahil noong Linggo, binuksan ang isa pa niyang paresan sa Visayas Ave, Quezon City. 

Aniya, lahat ng kinikita niya ngayon ay inilalagay niya sa magandang bagay at hindi niya iniisip mag-dyowa.

“Actually, ang love life ko ngayon, ang lalaki ko ngayon, parang ano lang, tikim-tikim lang muna. Ayoko munang seryosohin ang relationship. Alam n’yo kung bakit? Kasi iniisip ko, baka mamaya, kapag nagdyowa ako ng 2 or 3, bukas, wala akong puhunan, maubos.

“So, feeling ko, habang nagtitinda ako, nagbi-business ako muna, mag-iipon muna ako. Kasi feeling ko, kapag marami ka nang pera, mas marami ka pang lalaki, ‘di ba?” aniya.

Sa kabilang banda, nagpapasalamat si Diwata sa pagkakakuha sa kanya bilang miyembro na ng Shift and Chillax vape family.

Ang Shift and Chillax ay ang dalawa sa leading vape brands sa ating bansa na nag-collaborate via the first-ever VapeFest sa Pasig City.

Bukod kay Diwata dumalo rin ang ibang top social media influencers sa pangunguna nina Rosmar, Boss Toyo, Ava Mendez, Bogart at 50+ more influencers.

Bongga ang naganap na vape fest dahil nagpa-raffle sila ng kotse, big bikes worth P5-M 

bilang pasasalamat at pa-bonus sa mga guest.