Concert ng ilang artists postponed

MAY mga nagtatanong. Bakit daw kaya postponed ang concert ng ilang artists natin sa ngayon? Huwag ninyong idahilan ang init ng panahon basta ang isang concert ay hindi natuloy, ibig sabihin lang niyon ay walang bumibili ng tickets sa concert nila. Kung ano man ang dahilan at hindi iyon mabili ng mga tao ibang usapan na iyon basta ang dahilan ng postponement ay mababang ticket sales.

Mayroon namang iba na huwag lang mapahiya sa mismong araw ng concert ay ipinamimigay na nila ang tickets after all, may kita naman sila kahit na paano sa sponsors. Minsan nangyari sa amin iyan eh may mga taong inaabutan kami ng concert tickets sa harapan ng Araneta Coliseum. Hindi lang isa kundi maraming ticket at kinukumbinsi kaming magtawag pa ng mga kaibigan namin para mas maraming manood.

Pero hindi namin pinatulan dahil kilala namin ang singer na hindi naman magaling kumanta kundi puro tili lang ang alam gawin. Bakit naman namin sasayangin pa ang oras namin sa ganoon?