Jerald Napoles ‘nanakit’ ng mga manonood

SHOWBIZ KONEK
ni Maricris Valdez Nicasio

EFFECTIVEpalang drama actor itong si Jerald Napoles dahil napaiyak niya ang halos lahat ng mga nanood sa premiere night ng kanyang pelikulang pinagbibidahan, ang Instant Daddy ng Viva Films.

Aba naman kahit may kaunting komedya pa rin ang pelikula, mas nanaig ang drama nito na ang istorya ay ukol sa isang lalaking super playboy na sinubok ng pagkakataon nang magkaroon ng anak. Anak na nagturo sa kanya ng tunay na pagmamahal at pagpapahalaga sa isang relasyon.

Masaya silang namuhay ng batang noong unang ibigay at ipagkatiwala sa kanya ng dating syota ay ayaw panindigan o pangalagaan. Subalit dumating ang panahong naging importante na ang batang iniwan sa kanya. Nagkaroon lamang ng problema nang magpakita ang inang nag-abandona ng matagal na panahon sa bata.

Pero wait hindi rito nagkaroon ng problema. Mas may malalim pang nangyari na tiyak ikaloloka at ikawiwindang ninyo. 

Sa pelikulang ito nasabi naming magaling palang mag-drama si Jerald. Hindi lang siya pang-komedya, pang-drama pa. No wonder ganoon siya ka-proud ipapanood sa kanyang love of his life na si Kim Molina ang Instant Daddy. Buong ningning na sinuportahan ni Kim si Jerald gayundin naman si Jerald na nagpa-selfie pa sa audience para maikompara ang hitsura ng mga nanood bago at pagkatapos ng pelikula.

Kung bakit ipinagawa ito ni Jerald, watch na lang kayo sa mga sinehan na palabas na simula kahapon.

Maayos din ang pagkakalatag ng istorya dahil na rin sa magandang pagkakadirehe ni Crisanto Aquino na talagang pumiga sa galing ni Jerald para maayos na magampanan ang karakter sa family drama movie.

Bukod kay Jerald, kasama rin sa pelikulang ito sina Athea Ruedas, Ryza Cenon, at Danita Paner.