Ice Seguerra special guest sa concert ni Alanis

SHOWBIZ KONEK
ni Maricris Valdez Nicasio

NA-EXCITE kami para kay direk Ice Seguerra dahil siya ang special guest sa concert ng Canadian-American singer and songwriter na si Alanis Morissette na magaganap sa August 1 at 2 sa Mall of Asia Arena, 8:00 p.m..

Sa pakikipagpalitan namin ng mensahe kay direk Ice, aminado itong sobra rin siyang na-excite na makasama sa Alanis 2023 concert dahil idolo niya ang magaling na singer.

“Super excited ako kasi idol ko siya. Bata pa lang ako, super fan na ako,” mensahe nito sa amin.

Bale si Ice ang opening artist sa concert ni Alanis at limang kanta ang aawitin niya.

“Buong Jagged Little Pill na album, kabisado ko,” anito nang matanong kung anong kanta ang paborito niya kay Alanis.

Nag-umpisa ang career ni Alanis early 90’s sa pamamagitan ng dalawang dance-pop albums. Noong 1995 ay ini-release niya ang Jagged Little Pill, isang alternative rock-oriented album na may element ng post-grunge na nakapagbenta ng 33 million copies globally at kaya siya naging cultural phenomenon. Ito rin ang dahilan kaya nakakuha siya ng Grammy Award for Album of the Year noong 1996.

Kasama sa Jagged Little Pill album ang mga awiting You Oughta Know, Hand in My Pocket, Ironic, You Learn, Head Over Feet, at All I Really Want.