HATAW! D'yaryo ng Bayan hatawtabloid.com
APAT na parangal ang nakuha ng ABS-CBN sa unang Asia-Pacific Broadcasting+ Awards na layuning kilalanin ang mga proyekto na nagpamalas ng husay at pagbabago sa broadcasting sa larangan ng teknolohiya, digitalization, at engineering.
Nakamit ng ABS-CBN News ang Broadcast Innovation award para sa OB Ranger Project nito na nakatulong para mapanatili ng kompanya ang multi-camera live coverage mula sa field na walang dagdag na gastos sa pamamagitan ng paggamit ng lumang equipment.
Nagwagi rin ang iWantTFC ng Excellence Award for OTT Platform sa pagtugon nito sa viewing habits ng mga manonood saan man sa mundo, habang nakamit ng ABS-CBN Global at ABS-CBN Broadcast Technology team ang Innovation Award for Cloud-Playout Migration na natugunan naman ang mga traditional playout problem gamit ang iWantTFC na wala ring dagdag gastos.
Nag-uwi rin ang subsidiary ng ABS-CBN na Big Dipper ng Innovation Award for Audio Description sa pagbibigay ng maganda at inclusive na viewing experience sa mga manonood na may kapansanan sa pandinig.
Sina head of ABS-CBN Digital News Gathering Val Cuenca, Operations Desk editor Kerchlynn Tan, at head of ABS-CBN Media Engineering Patrick Ongchangco ang tumanggap ng mga parangal ng ABS-CBN.
Ang Asia-Pacific Broadcasting ang nasa likod ng Asia-Pacific Broadcasting+ Awards na ginanap noong Hunyo 8 sa Crowne Plaza, Changi Airport sa Singapore.
