HATAW! D'yaryo ng Bayan hatawtabloid.com
PATAY ang mag-ina na tila nakulong sa nasusunog nilang kuwarto, sa insidente ng hinihinalang arson sa Quezon City kahapon.
Tumanggi muna ang Bureau of Fire Protection (BFP) na pangalanan ang mga biktima, ang ina ay inilarawang nasa 40-anyos ang edad, habang 17 hanggang 18-anyos ang kanyang anak na babae, dahil wala pa umanong clearance ang pamilya.
Batay sa ulat ng BFP, pasado 2:00 pm nang maganap ang sunog sa dalawang palapag na tahanan na matatagpuan sa 13-2 Avelino Alley, sa Lt. J. Francisco St., Brgy, Krus Na Ligas, Quezon City.
Ang bahay ay pagma-may-ari ni Pepito Mente ngunit inookupa umano ng isang Judy Aquilino at Alexis Aquilino.
Umabot lamang ng unang alarma ang sunog bago tuluyang naapula dakong 2:58 ng madaling araw.
Nagulat ang mga nagresponde dahil tumambad sa kanila ang wala nang buhay na mag-ina sa loob ng isang kuwarto. Nabatid na anim na buwan pa lamang nangungupahan ang mga biktima.
Inaalam ng BFP ang sanhi ng apoy, ngunit kabilang sa iniimbestigahan nila ang posibleng arson o sinadyang sunog.
“Kakaiba po ang sunog na ito, iisang kuwarto po (siya) at merong commotion… nandoon ‘yung bata, sinasabing nagsisigaw ng tulong at hindi mabuksan kasi naka-lock po nga. At later on, siguro mga ilang minuto, nando’n na nga, bigla na lang nagkaroon ng apoy at nagkaroon ng sunog doon,” ayon kay Fire Sr. Supt. Aristotle Bañaga.
Tinataya ng mga awtoridad na halos ‘P24,000 lang’ ang halaga ng mga ari-arian na natupok sa sunog at tanging ang silid lamang ng mga biktima ang naapektohan. (ALMAR DANGUILAN)
