HATAW! D'yaryo ng Bayan hatawtabloid.com
SHOWBIZ KONEK
ni Maricris Valdez Nicasio
AMINADO si Toni Gonzaga na ikinalulungkot niya ang nangyayari ngayon sa kaibigang si Vhong Navarro.
Sa media conference kahapon ng tanghali para sa kanyang 20th anniversary concert na I Am…Toni hindi itinanggi ng Ultimate Multimedia Star na nalungkot siya kay Vhong.
“Siyempre hindi mo maiaalis na malungkot, ako hindi ko alam kung ano ang gagawin ko, all I can offer now is prayers,” sambit ng aktres/TV host nang hingan ng reaksiyon tungkol kay Vhong. Dalawang pelikula rin ang pinagsamahan nina Toni at Vhong, ito ay ang D Anothers (2005 ) at My Only You (2008).
Hanggang ngayon ay hindi pa napagbibigyan ang kahilingan ng kampo ni Vhong na makapaglagak ng bail para sa kinakaharap na rape case. Ang tiyak pa lang, ililipat ang aktor sa Taguig City Jail mula sa NBI detention center.
Sa kabilang banda, ayaw pang ihayag ni Toni kung sino-sino ang mga guest niya sa I Am Toni concert na gaganapin sa Araneta Coliseum sa Enero 20, 2023 dahil sorpresa iyon. Ang tiyak, ang magiging guest niya ay naging parte ng career niya ang mga iyon.
Nang tanungin kung kasama ba roon si Piolo Pascual? Ang tugon ng aktres, “basta surprise.”
