Helper malubha sa pamamaril

KRITIKAL ang kalagayan sa pagamutan ng isang 21-anyos na helper matapos barilin ng isa sa dalawang hindi  nakilalang mga suspek sa Malabon City, kahapon ng madaling araw.

Inoobserbahan sa Tondo Medical Center (TMC) ang biktimang kinilalang  si Daniel Delos Santos, residente ng Block 20 Lot 72 Phase 2 Area 4, Brgy. Longos sanhi ng tinamong tama ng bala sa kaliwang pisngi,

Pinaghahanap naman ang mga suspek na mabilis na tumakas matapos ang mga suspek matrapos ang pamamaril sa biktima.

Ayon kay Malabon  City police chief Col. Albert Barot, unang nag-inuman ang biktima at kanyang tatlong kaibigan sa loob ng JKHEN Motor Parts Shop sa  Leono St. Brgy. Tanong ng lungsod.

Dakong 1:00 ng madaling araw, habang naglilinis sila ng kanilang kalat matapos ang tagayan nang dumating ang mga suspek na nakasuot ng puting jacket at pants habang ang isa ay nakasuot naman ng dilaw na jersey at shorts pants.

Nagsilbing look-out ang isa habang pumasok naman sa loob ng shop ang gunman saka binaril ang biktima sa pisngi bago mabilis na nagsitakas patungong C4 Road.

Isinugod ang biktima ng kanyang mga kaibigan sa nasabing pagamutan habang ayon kay P/Major Ronald Carlos natukoy na nila ang gunman subalit, hindi muna nila pinangalanan habang nagpapatuloy ang hot pursuit operation.

Sinabi pa ni Maj. Carlos na pinaniniwalaang selos ang dahilan ng pamamaril dahil malapit umano ang biktima sa girlfriend ng suspek. (Rommel Sales)